MariBolheras

Sex Panic é um conceito utilizado para explicar a reacçom ante a dissidência sexual, ante o estrano, ante o que está fora da normalidade. O pánico sexual funciona de maneira repressiva e violenta ante o que se percebe como umha ameaça ao moralmente estabelecido. O pánico sexual está documentado desde o séc XIX, e manifesta-se periodicamente em movimentos populares, reformas legislativas, razzias policiais, malheiras e assasinatos, etc.

Isaac Pérez Triviño e Júlio Anderson Luciano forom assasinados de forma cruel na cidade de Vigo.
Michael Causer foi violentamente golpeado até a morte em Liverpool.

Os responsáveis das suas mortes actuarom movidos polo pánico sexual. Forom julgados e absolvidos por sendos júris populares, nas cidades de Vigo e Liverpool. Ambos tribunais amparam-se no conceito de legítima defensa para absolver aos encausados. O que venhem a dizer, malinterpretando totalmente o conceito jurídico, é que um homem heterossexual está legitimado a actuar violentamente se sente molesto por ter-se-lhe insinuado relaçons sexuais que considera imorais ou perversas.

Os próprios júris populares de Liverpool e Vigo compartilham esse pánico sexual e amparam estes crimens homofóbicos.

Saímos à rua:
25 de fevereiro, Aturuxo conovoca concentraçom contra a homofobia na justiça no Toural (Compostela)
8 de março, manifestaçom em régimen de auto-convocatória em Vigo (Porta do Sol)

Estade atentas porque as maribolhis também nos movilizaremos!

Com 7 votos frente a 2, um jurado popular acava de absolver a Jacobo Piñeiro, responsável do assasinato de Isaac Pérez Triviño e Júlio Anderson Luciano. Consideram que o autor confesso dos crimens só é culpável de incendiar a casa para borrar as pegadas, e que sofreu um “medo insuperável” a ser violado. Um pai de família -como Deus manda- frente a umha parelha de maricons, um deles imigrante. Eles o procurarom. Actuou em legítima defensa movido por um medo insuperável a ser violado. Este é o raçoamento do jurado popular. Por isso assestou-lhes 57 coiteladas, atou-nos à cama, abriu o gas e prendeu lume à casa em 5 focos diferentes. Quando um dos assasinados, gravemente ferido, logrou encerrar-se num dormitório escapando do seu agressor, e mentres chamava à polícia, Jacobo Pinheiro tirou à porta abaixo e volveu agredir ao moribundo para rematá-lo. O outro já estava morto. Isto para o jurado popular é legítima defensa.

Dizia Judith Butler que é necessário perguntar-nos pola ligaçom entre coerçom e submissom às normas de gênero. Os crimens de ódio homófobos estariam relacionados coa existência da justificaçom da violência, fruto de um pánico profundo e de umha angústia extrema ante o incumprimento das normas da masculinidade heterossexual. Esta violência foi justificada e amparada onte polos 7 membros do jurado popular que tapam as caras ante os fotógrafos.

Algo hai que fazer!

Hai uns dias surprendia-nos a notícia de que o colectivo? LGBT Milhomes, da mao do seu ‘presidente’ José Carlos Alonso Sánchez, pedia o voto para o Partido Popular nas próximas eleiçons.

Ante esta declaraçom, que nom é mais que umha perla na longa lista de exabruptos aos que nos tem acostumadas este senhor, Maribolheras Precárias quer fazer público o seguinte:

O grupo Milhomes foi um dos primeiros colectivos LGBT que surgiu na cidade da Corunha. A sua desapariçom hai um par de anos nom evitou que o que fora por um tempo o seu presidente siga a falar em nome do colectivo, botando por terra todo o labor dum grupo de gente que historicamente formou parte do mesmo. Atravês da apropriaçom do domínio ‘Milhomes‘ na internet, as mentiras e difamaçons contínuas formam parte cotiá do seu discurso e do seu blogue. Este senhor, que só se representa a si mesmo, segue a ser considerado por alguns meios de comunicaçom como interlocutor ou portavoz dum colectivo que nom existe, e por extenssom, do movimento de gais, lésbicas e transsexuais.

Coa cólera e a raiva que lhe produz nom ter logrado um posto nas instiuiçons locais, arremete contra todo e alia-se co dianho com tal de sair na prensa: di que o seu apoio nestas eleiçons vai para Nuñez Feijoo, e o grande motivo para fazé-lo é que assistiu a umha voda de dous militantes gais do PP em Ourense.

Desde Maribolheras Precárias, e pensamos que também é o sentir do conjunto do movimento galego de gais, lésbicas e transsexuais, queremos denunciar publicamente a atitude deste senhor-colectivo, e pedir-lhe tanto aos meios de comunicaçom como às instituiçons mais rigor à hora de dar credibilidade, voz e protagonismo a este tipo de personagens.